Soe acontecer aos
habilitados estatais que cando chegan a prestar os seus servizos a un
novo destino, atopan un fato de procedementos inconclusos e moitos
deles "enquistados" debido a un enfoque inadecuado no seu
inicio, xeralmente por un común afán de resolvelos canto antes.
Afirmaba o profesor
Chacón Ortega que cando se toma o tempo necesario nas actuacións
preparatorias dos procedementos administrativos estase a garantir
unha instrucción ordenada e unha eficaz resolución, de xeito que
non teñamos que volver atrás no camiño que cabalmente trazamos
cando se tomóu a decisión de incoar o expediente. A miña
experiencia persoal demostroume unha e outra vez o acertado do aserto
anterior.
Un deses procedementos
"enquistados", que atopei no segundo ano tras incorporarme
a este posto de traballo, versaba sobre unha presunta usurpación ou
perturbación dun suposto camiño de concentración parcelaria,
supostamente de titularidade municipal, ó que se lle engadían as
dúbidas razonables de ubicarse na zona de dominio público do
ferrocarril, administrado polo Administrador de Infraestructuras
Ferroviarias (ADIF). As primeiras actuacións versaban de 2002 e o
asunto, sen resolver, chegou ó meu coñecemento no ano 2009. Tras
unha serie de investigacións e a necesaria, anque insegura,
ordenación documental, cruzouse no meu camiño unha queixa formulada
polo interesado diante do Valedor do Pobo, que foi preciso resolver,
conforme á lexislación que rexe o funcionamento desta Institución
da nosa comunidade autónoma.
O Alcalde encargou ó
Secretario a elaboración dun informe que permitira establecer o
estado de cousas e as propostas de actuacións futuras. Redactado tal
informe, foi remitido ó Valedor do Pobo. Nos días seguintes,
confirmouse persoalmente a recepción do mesmo e fun felicitado
persoalmente de forma expresa por un dos Letrados Asesores da
institución, quen me manifestou literalmente "hace muchos años
que no veo un informe municipal tan bien redactado".
Felicitación que, como cabe supoñer, me produce -humildemente- un
grande orgullo e a sensación de que o traballo dos Secretarios dos
pequenos Concellos é indudablemente gratificante; o recoñecemento
expreso da nosa entrega profesional e a nosa vontade de facer as
cousas o mellor posible en beneficio do interés xeral, conciliándoo
na medida do posible cos lexítimos intereses das persoas, máis alá
de calesquera formalismos, é como o aplauso para os artistas.
Na medida en que poida
resultar de algunha utilidade a calesquera compañeiros/as e
profesionais en xeral, reproduzo o citado informe, desprovisto de referencias personais ou de identificación da propiedade, que carecen de interés ós efectos desta publicación.
INFORME
Queixa
formulada por D. M. ante o Valedor do Pobo relativa a posible
invasión do camiño de acceso a súa propiedade.
Ref.
Expte. Valedor: ------------
CELESTINO
J. AMIGO, Secretario do Concello de Oza dos Ríos, conforme
ó preceptuado no artigo 3.a do Real Decreto 1174/1987, do 18 de
setembro, polo que se regula o réxime xurídico dos Funcionarios de
Administración Local con habilitación de carácter de carácter
nacional (estatal) e demáis disposicións normativas concordantes,
emito o presente informe, con base nos antecedentes e consideracións
xurídicas que seguidamente se expoñen.
ANTECEDENTES:
1.-
Relativos ó procedemento concreto obxecto da queixa:
O
29 de xuño de 2002 rexístrase no Concello de Oza dos Ríos escrito
de D. M., en calidade de propietario da parcela rústica xxx,
segregada da finca número xx do plano xeral de concentración
parcelaria de Mondoi-Porzomillos. Manifesta que o propietario da
parcela colindante (número yy) realizou plantacións e cerramento
perimetral que, según parece, invaden o camiño de acceso á finca
do comparecente. Solicita que os servizos técnicos do Concello
comproben a presunta invasión do camiño.